Ta`kidlash o'rinliki, Konstitutsiya nafaqat davlat hokimiyati va boshqaruvini tashkil etish tamoyillarini, balki ijtimoiy hayot me`yorlarini ham o'zida aks ettirishi bilan davlatning qonunchilik tizimidagi asosiy huquqiy hujjat hisoblanadi. Ijtimoiy hayotga tatbiq etiladigan boshqa barcha qonunlar uchun muhim ahamiyatga ega bo'lgan tamoyillar unda belgilangan me`yorlar asosida  mustahkamlanadi. Shu bois Konstitutsiya ijtimoiy hayotning barcha jabhasidagi munosabatlarni tartibga solish, shuningdek, davlatning ichki va tashqi siyosatini ifoda etish, amalga oshirishda  muhim huquqiy manbalardan biri sanaladi.

Konstitutsiya, shuningdek, muhim amaliy tashkilotchilik vazifasini bajarib, qonunchilik tizimi hamda huquqiy tartibni mustahkamlash, tegishli davlat tuzilmalarini qayta tashkil etish va yanada takomillashtirishni ham ko'zda tutadi.

O'tgan tarixan qisqa davr mobaynida yurtimizda konstitutsiyaviy me`yor va tamoyillar ustuvorligini, fuqarolarning shaxsiy, siyosiy, ijtimoiy-iqtisodiy huquq hamda erkinliklarini ta`minlash borasida ulkan ishlar amalga oshirildi. Bugun yurtimizda qaror topgan tinch­lik, osoyishtalik,  fuqarolar va millatlararo totuvlik, shuningdek,  tobora yuksalib borayotgan xalqimiz turmush farovonligi, ijtimoiy-siyosiy, iqtisodiy, ma`naviy sohalar taraqqiyoti zamirida  milliy va umumbashariy tamoyillarni o'zida aks ettirgan Bosh qomusimizning o'rni, ahamiyati beqiyos.

Konstitutsiyamizda irqi, millati, ijtimoiy kelib chiqishi, tili, dinidan qat`i nazar barcha fuqarolarning  qonun oldida teng etib belgilangani mamlakatimizda insonparvarlik tamoyillari ustuvor ahamiyatga ega ekanining o'ziga xos namunasidir. Xususan, 14-moddada: «Davlat o'z  faoliyatini inson va jamiyat, farovonligi ko'zlab, ijtimoiy adolat va qonuniylik prinsiplari asosida amalga oshiradi», deb belgilangan.

Shuningdek, davlat organlari va mansabdor shaxslar jamiyat va fuqarolar oldida mas`ul ekanligining tegishli moddalarda mustahkamlab qo'yilgani yurtimizda kuchli fuqarolik jamiyati barpo etish yo'lidagi muhim omillardan biri bo'lganini ham alohida ta`kidlash o'rinlidir.  

Mamlakatimizda davlat boshqaruvi tizimini yanada demokratlashtirish, davlat organlari  o'rtasida vakolatlarning mutanosib taqsimlanishini ta`minlash, ijtimoiy-iqtisodiy, siyosiy sohalardagi islohotlarni izchil amalga oshirishda, shuningdek, mamlakatni yangilash va modernizatsiya qilish jarayonida parlament, siyosiy partiyalarning roli hamda ta`sirini kuchaytirish maqsadida yaqinda Konstitutsiyamizning 78, 80, 93 va 98-moddalariga tegishli o'zgartirish va qo'shimchalar kiritish to'g'risida O'zbekiston Respublikasining Qonuni qabul qilindi. Bu o'zgartish va qo'shimchalar  davlatimiz rahbarining 2010 yil 12 noyabrda bo'lib o'tgan parlament palatalarining qo'shma majlisidagi «Mamlakatimizda demokratik islohotlarni yanada chuqurlashtirish va fuqarolik jamiyatini rivojlantirish konsepsiyasi»ga bag'ishlangan ma`ruzasida qayd etilgan, mohiyati jihatidan davlatimizni demokratik rivojlantirish, fuqarolik jamiyatini qurishda yangi bosqichni boshlab bergan qonunchilik tashabbuslariga muvofiq ishlab chiqilgani bilan ahamiyatlidir. 

Bir so'z bilan aytganda, bugun mamlakatimizda ijtimoiy adolat,  insonparvarlik, teng­lik tamoyillarini o'zida mujassam etgan Bosh qomusimiz negizida amaldagi qonunchilik tizimi  milliy va umumbashariy qadriyatlar asosida tobora takomillashib bormoqda. Bu esa, o'z o'rnida, qonun ustuvorligini ta`minlagan holda kuchli fuqarolik jamiyati barpo etishimizda  muhim mezon bo'lib xizmat qilishi shubhasizdir.

Avaz ISKANOV,

Toshkent yuridik kolleji  o'qituvchisi