Davlatimiz rahbarining 2008 yilda qabul qilingan «Bolalar musiqa va san`at maktablarining moddiy-texnik bazasini mustahkamlash va ularning faoliyatini yanada yaxshilash bo'yicha 2009-2014 yillarga mo'ljallangan Davlat dasturi to'g'risida»gi Qarori o'g'il-qizlarga jahon andozalari darajasida musiqiy ta`lim berish, bu yo'nalishdagi bilim dargohlari ishini takomillashtirish barobarida yosh iste`dod sohiblarini kashf etishda yana bir muhim qadam bo'ldi.

- Joriy yilda yosh san`atkorlarimiz respublika va xalqaro miqyosda bo'lib o'tgan ko'plab nufuzli xalqaro tanlovlarda munosib ishtirok etib, mamlakatimizda yoshlarga yuksak e`tibor qaratilayotganini yana bir bor namoyish etdi, - deydi O'zbekiston Respublikasi Xalq ta`limi vazirligi Musiqa va san`at ta`limi muassasalari boshqarmasi boshlig'i o'rinbosari Jumaqul Shomurodov. - Ayni payt­gacha xalqaro festival va ko'rik-tanlovlarda yosh san`atkorlarimizning qariyb 30 nafarga yaqini o'z iqtidorini namoyish etib, sovrindor bo'lishdi.

Xususan, yaqinda Italiyaning San Bartolomeo al-Mare shahrida o'tgan yosh musiqachilarning «Giovani Talenti» 26-xalqaro tanlovida yurtimizning yosh musiqachilari jahon va o'zbek kompozitorlarining asarlarini yuksak mahorat bilan ijro etib, tanlov hakamlar hay`ati, san`atshunoslar, ixlosmandlarning yuksak e`tirofiga sazovor bo'ldi. Unda R.Gliyer nomidagi Respublika ixtisoslashtirilgan musiqa akademik litseyining o'quvchisi Dilshod Narzullayev violonchel ijrosida hamda Oqila Mirxo'jayeva fortepiano chalish bo'yicha tanlovning Gran-prisini qo'lga kiritdi. Mazkur litseyning yana bir o'quvchisi Yulduz Mullajonova esa skripka chalish bo'yicha uchinchi o'rinni egalladi.

- Inson qalbiga yuksak va olijanob tuyg'ularni singdirish, uni ezgu va xayr­li ishlarga da`vat etishda, ma`naviyatini yuksaltirishda musiqaning o'rni va ahamiyati beqiyos, - deydi Oqila Mirxo'jayeva, - Yurtimizda san`atni yanada rivojlantirish, iste`dodli yoshlarni aniqlash va rag'batlantirishga alohida e`tibor qaratilmoqda. Italiyadagi xalqaro tanlovda yurtdoshlarimiz, ota-onamiz va umuman bizga ishonch bildirgan barcha kishilarning cheksiz mehr-e`tiborini chin yurakdan his etgan holda ishtirok etdik. Ushbu rag'bat bizga qanot bag'ishlab, yanada ulkan yutuqlar sari undaydi.

- Musiqa insoniyat tafakkurining buyuk kashfiyotlaridandir, - deydi Respublika musiqa va san`atga ixtisoslashgan maktab-internati direktori Zulfiqor Xolmirzayev. - Shuning uchun ham musiqa tili, millati, dini va urf-odatidan qat`i nazar, yer yuzidagi ko'plab millat va xalqlarni birlashtiradigan qudratli va ta`sirchan vositalardan biridir. Qayd etishim lozimki, bizning maktab-internat o'quvchilari ham har yili mamlakat va xalqaro festival va ko'rik-tanlovlarda muntazam qatnashib, doimiy ravishda sovrinli o'rinlarni qo'lga kiritib keladi. Jumladan, shu yil 2-14 sentyabr kunlari Italiyaning Fermo shahrida o'tkazilgan «Italy Percussion Competition» xalqaro zarbli cholg'ular festivalida maktabimiz o'quvchisi Abdulaziz Rahimberdiyev marimba cholg'usi ijrochiligi bo'yicha birinchi o'rinni qo'lga kiritdi.

Hasan MO'MINOV,

«Jamiyat» muxbiri