Ma`lumki, mamlakatimizda jamiyatning eng muhim bo'g'ini bo'lgan oila institutini milliy va umumbashariy qadriyatlar asosida rivojlantirish, uni ijtimoiy hayotdagi nufuzini oshirish masalasiga katta e`tibor qaratib kelinmoqda. Bosh qomusimizda oilaning maqomi aniq belgilab qo'yilgani, shu asosda Oila, Fuqarolik kodekslari va boshqa qonun hujjatlari qabul qilinib, muhim huquqiy poydevor yaratilgani bu boradagi ezgu sa`y-harakatlarimizga keng yo'l ochmoqda.  Xususan, 1998 yil mamlakatimizda «Oila» yili deb e`lon qilinishi bu yo'ldagi muhim qadamlardan biri bo'lgan edi.

Aytish joiz, har bir insonning ma`nan va jismonan sog'lom kamol topishida, kelajakka ezgu maqsad-muddaolar bilan intilishida oiladagi tarbiyaviy muhit, shart-sharoitning ahamiyati beqiyos.  Oilada sog'lom muhit qaror topishini ta`minlash esa turmush qurayotgan yoshlarga ko'p jihatdan bog'liqdir. Boisi bo'lajak ota-ona yosh oila qo'rg'onini qanchalik mustahkam barpo etsa, uning ertasi shunchalik yorug' bo'ladi. Zero, davlatimiz rahbari ta`kidlaganidek: «...mustahkam oila va baxtli turmush avvalambor oila quradigan yoshlarning o'ziga, ularning aql-zakovati, ma`naviy fazilatlariga, oila, jamiyat oldidagi o'z burchi va mas`uliyatini chuqur anglab yetishiga bog'liq. Bu haqiqatni hech kim inkor etolmaydi. Lekin, endi paydo bo'lgan, katta umid bilan hayotga qadam qo'yayotgan yosh oilani moddiy va ma`naviy jihatdan keng qo'llab-quvvatlash, ularga ko'mak, imtiyoz va imkoniyatlar yaratib berish, avvalo, uy-joy bilan ta`minlash - bularning barchasi uchun nafaqat ota-onalar, birinchi navbatda davlat va jamiyatimiz mas`uldir...».

Darhaqiqat, bugun yurtimizda yosh oilalarni moddiy va ma`naviy qo'llab-quvvatlash, ularni uy-joy bilan ta`minlash borasida keng ko'lamli ishlar amalga oshirilmoqda. Xususan, mamlakatimiz Prezidentining 2007 yil 18 mayda «Yosh oilalarni moddiy va ma`naviy qo'llab-quvvatlashga doir qo'shimcha chora-tadbirlar to'g'risida»gi Farmoni yosh oilalarga bo'lgan e`tibor va g'amxo'rlikning yorqin namunasi bo'lib, bu mustaqil hayot ostonasiga qadam qo'yayotgan yoshlarimizning tinch va farovon turmush tarzini ta`minlashga munosib xizmat qilayotir.   Bu borada, eng avvalo, turmush quruvchi yoshlarni salomatligini mustahkamlash masalasiga katta e`tibor qaratilayotganini ham alohida e`tirof etish o'rinlidir. Zero, sog'lom oiladagi sog'lom nasl dunyoga keladi.  Sog'lom avlod esa har bir millatning munosib davomchisi, yurt kelajagining mustahkam poydevori demakdir.  Prezidentimiz ta`biri bilan aytganda, oila sog'lom ekan - jamiyat mustahkam, jamiyat mustahkam ekan - mamlakat barqaror.

Bir so'z bilan aytganda, bugun yurtimizda har bir  oilada sog'lom muhitni qaror toptirishga qaratilayotgan e`tibor va g'amxo'rlik, bu boradagi izchil islohotlar xalqimiz turmush farovonligi, jamiyatimiz taraqqiyotini yuksaltirish orqali yangi «Mustahkam oila yili»da yanada keng ko'lam kasb etishi shubhasiz.

Nilufar HAMIDOVA,

Toshkent bank kolleji o'qituvchisi