Bosh Qomusimizda inson, uning huquq va erkinliklari, sha`ni, qadr-qimmati oliy qadriyat sifatida e`tirof etiladi. Bu esa har bir fuqaroning huquq va manfaatlarini himoya qilishda xalqaro huquqning umume`tirof etilgan g'oyalarini, umumbashariy qadriyatlarni o'zida namoyon etgani bilan ahamiyatlidir.

Inson manfaatlari va erkinliklari haqida so'z yuritganda, eng avvalo, shaxsiy daxlsizlik huquqi haqida to'xtalib o'tish o'rinlidir. Zero, erkinlik va shaxsiy daxlsizlik har bir inson tug'ilishi bilan qo'lga kiritiladi, bu har kim erkin, o'z ixtiyori bo'yicha harakat qilish imkonini beradigan uzviy huquqdir.

Eng muhimi, bu kabi huquqiy qoidalar Konstitutsiyamizdagi tegishli moddalarda o'z aksini topgan. Jumladan, Bosh Qomusimizning 24-moddasida yashash har bir insonning uzviy huquqi ekanligi, 25-moddasida har kim erkinlik va shaxsiy daxlsizlik huquqiga ega ekanligi, hech kim qonunga asoslanmagan holda hibsga olinishi yoki qamoqda saqlanishi mumkin emasligi belgilab qo'yilgan. 

O'tgan davr mobaynida bu borada bir qator ishlar amalga oshirildi. Jumladan, inson huquq va erkinliklarini himoya qilishga qaratilgan qonunchilik bazasi  qayta ko'rib chiqilib, yanada takomillashtirildi. 1991 yil 30 sentyabrda mamlakatimizning Inson huquqlari Umumjahon Deklaratsiyasiga qo'shilishi bu boradagi dastlabki muhim qadam bo'lgan edi. Ushbu halqaro huquqiy hujjatning qoidalarida mustahkamlangan inson huquq va erkinliklarini ta`minlash, inson hayoti daxlsizligi, sha`ni, qadr-qimmati va boshqa qonuniy manfaatlar himoyasi  Konstitutsiyamizda ham o'z aksini topgan.

Bir so'z bilan aytganda, Bosh Qomusimiz mamlakatimizda inson, uning manfaatlarini ro'yobga chiqarishga qaratilgan islohotlarni  izchil amalga oshirishning muhim kafolatidir.

Akbar BOBOYEV,

O'zbekiston Respublikasi

Bosh prokuraturasi

Oliy o'quv kurslari tinglovchisi