Anjumanda ta`kidlanganidek, «O'zbekiston madaniyati va san`ati forumi» jam­g'armasi hamda «O'zbekkino» milliy agentligi tashabbusi bilan tashkil etilayotgan Toshkent xal­qaro kinoforumi milliy kino san`atimiz an`analarini munosib davom ettirish, yurtimiz hamda xorij kino ijodkorlari o'rtasida o'zaro tajriba almashish va mustahkam hamkorlik aloqalarini o'rnatish, shuningdek, o'zbek tomoshabinlarini zamonaviy kinematografiya olamidagi bugungi jarayonlar, jahon kinosining eng sara asarlari bilan yaqindan tanishtirish, qolaversa, milliy kinematografiyaning taraqqiyot bosqichlarini keng namoyish etishga qaratilgani bilan ahamiyatlidir.

— «Inson taqdiri — tuyg'ular falsafasi» shio­ri ostida tashkil etilayotgan mazkur loyihada Yaponiya, Litva, Rossiya kabi mamlakatlarning mohir kinorejissyorlari, prodyusserlari, akyotrlari, ssenariynavislari, kino tanqidchilari ishtirok etadi, — deydi O'zbekiston Fanlar akademiyasi San`atshunoslik instituti katta ilmiy xodimi Nigora Karimova. — Xalqaro kinoforum dasturi to'liq metrajli badiiy film­lar, qisqa metrajli va animatsion filmlar kabi yo'nalishlar bo'yicha tanlovlarni o'z ichiga oladi. Aytish joiz, dunyoning 50 ga yaqin mamlakatlari kino ijodkorlarining tanlovda qatnishish istagini bildirgani mazkur tadbir kino san`atidagi muhim loyihalardan biri ekanining o'ziga xos ifodasidir.  

«XXI asr tamaddunlari: madaniyat muloqoti» mavzuidagi ushbu halqaro kinoforumga Germaniya, Ruminiya, Fransiya, Islandiya, Buyuk Britaniya, Gollandiya, Argentina, Tayvan, Polsha, Rossiya kabi bir qator mamlakatlar kinoijodkorlarining asarlari namoyish etiladi.

Tadbirda qayd etilishicha, forum doirasida, shuningdek, zamonaviy fransuz, nemis animatsiyasi, «Muhrlangan vaqt», «Zamonaviy o'zbek kinosi panoramasi», «Tomoshabin bilan bab-barobar», «Non-stop» kabi dasturlar, tanlov faxriy mehmonlari bilan ijodiy uchrashuvlar, mahorat darslari o'tkazilishi rejalashtirilmoqda. Tanlov doirasidagi bu kabi tadbirlar poytaxtimizdagi Yoshlar ijod saroyi, Alisher Navoiy nomidagi kino saroyi, Toshkent Davlat san`at instituti hamda «Premier-Hall» kinoteatrida bo'lib o'tadi.

Feruza KARIMOVA