VII Xalqaro O'zbekiston paxta va to'qimachilik yarmarkasining ochilishida ushbu tadbir mamlakatimiz tarixidagi shonli sana - mustaqilligimizning 20 yilligi keng nishonlanayotgan yilda o'tkazilayotgani ramziy ma`noga ega ekani ta`kidlandi. Darhaqiqat, istiqlol yillarida mamlakatimizning izchil rivojlanishi davlatimiz rahbari tomonidan ishlab chiqilgan islohotlarning «o'zbek modeli» nechog'li samarali va to'g'riligini yaqqol namoyon etmoqda. Raqamlarga e`tibor qaratsak, 20 yil davomida mamlakatimiz yalpi ichki mahsuloti xarid qobiliyati pariteti bo'yicha 3,5 baravar, sanoat mahsulotlari hajmi 3 baravar, eksport hajmi qariyb 30 baravar oshdi. Shunga hamohang ravishda O'zbekiston jahon xo'jalik munosabatlarida o'z ishtirokini izchil kengaytirmoqda.

O'zbekiston bugun jahon paxta bozoridagi yetakchi mamlakatlardan bo'lib, paxtani eksport qilish bo'yicha uchinchi o'rinda turadi. Eng yuksak standartlarga javob beradigan o'zbek paxta tolasiga bo'lgan talab muttasil oshib borayotir. Mamlakatimizdagi sheriklari bilan mavjud amaliy munosabatlarni yanada mustahkamlash va yangilarini o'rnatishdan manfaatdor bo'lgan Xalqaro O'zbekiston paxta va to'qimachilik yarmarkasining ishtirokchilari soni ham yil sayin ko'payib bormoqda. Masalan, 2005 yilda tashkil etilgan birinchi yarmarkada 30 mamlakatdan qariyb 170 treyder va to'qimachilik kompaniyalari qatnashgan bo'lsa, o'tgan yili ularning soni 300 ga yaqinlashdi. Bu yilgi, yettinchi yarmarkaga esa dunyoning turli mintaqalaridagi 38 davlatdan paxta va to'qimachilik sohasida faoliyat ko'rsatayotgan 330 kompaniyaning 660 nafardan oshiq vakili tashrif buyurdi. Shunisi e`tiborliki, paxta yetkazib berish jug'rofiyasi dunyoning yangi-yangi mintaqalari hisobidan tobora kengaymoqda. Jumladan, to'qimachilik sanoati jadal rivojlanayotgan Janubi-Sharqiy va Janubiy Osiyo mamlakatlarining ham O'zbekiston bilan hamkorlikka qiziqishi ortmoqda.

Umuman olganda, VII Xalqaro O'zbekiston paxta va to'qimachilik yarmarkasi jahon paxta biznesidagi yirik voqealardandir. Bu xalqaro xo'jalik munosabatlarida mamlakatimizning mavqei tobora mustahkamlanib borayotgani, amalga oshirilayotgan keng ko'lamli iqtisodiy islohotlar yuksak samaralar berayotganidan dalolatdir.

Rufat NE`MATOV,