Kuni kecha Toshkent Davlat madaniyat institutida Germaniyaning Keln shahri kutubxonasi direktori Fogt Xanneler ishtirokida mahorat darslari o'tkazildi. Ushbu tadbir Toshkent Davlat madaniyat instituti, Toshkent axborot texnologiyalari universiteti hamda Germaniyaning Gyote instituti hamkorligida tashkil etildi. Unda soha mutaxassislari, xalqaro ekspertlar, talaba yoshlar va ommaviy axborot vositalari vakillari ishtirok etdi.

Tadbir ishtirokchilari Keln shahar kutubxonasi tomonidan sohani rivojlantirish bo'yicha ishlab chiqilgan maxsus konsepsiya, ushbu muassasa xizmat ko'rsatish faoliyati, kutubxona veb-sahifasi haqida ma`lumot oldilar.

— Hozirgi kunda kutubxona marketinggi o'zgarib bormoqda, — deydi Fogt Xanneler. — Boisi ushbu muassasalarda zamonaviy axborot-kommunikatsiya texnologiyalar yordamida virtual kutubxonalar, xalqaro kitob ayirboshlash, elektron buyurtma singari yangi xizmat turlari paydo bo'lmoqda. Shundan kelib chiqib aytadigan bo'lsak, axborot-kutubxonalarda xizmat darajasi yuqori bo'lishini davr taqozo etmoqda.

Tadbirda ta`kidlanishicha, Keln shahar kutubxonasi xizmatidan har yili o'rta hisobda 18 million kishi foydalanadi. Shuningdek, ushbu muassasa 3 millionga yaqin foydalanuvchiga internet orqali xizmat ko'rsatadi. Bu har 7 soniyada kutubxonada mavjud muayyan  axborot manbai o'z qiziquvchisini topadi degani. Foydalanuvchilarning asosiy qismini 40 yoshgacha bo'lgan kishilar tashkil etadi.

Ochiq muloqot ruhida o'tgan tadbirda talaba yoshlar o'zlarini qiziqtirgan savollariga atroflicha javob oldilar.

 Timur AHMEDOV,

«Jamiyat» muxbiri