- Bugun dunyoda bir milliarddan ortiq odam doimiy ravishda to'yib ovqat yeyish imkoniga ega emas, - deydi BMT iqtisodchisi Manuel Mont. - Shu bois mazkur salbiy holatning oldini olish maqsadida turli ijtimoiy loyihalar amalga oshirilmoqda. Ta`kidlash o'rinliki, bunda aksariyat tashabbuskorlar «uchinchi sektor» vakillari hisoblanadi.

Ana shunday ijtimoiy loyihalardan biri Estoniyada amalga oshirilayotgan «Oziq-ovqat banki»dir. Loyihaning maqsadi mamlakatdagi kam ta`minlangan hamda ijtimoiy yordamga muhtoj insonlarga birlamchi oziq-ovqat mahsulotlarini yetkazib berishdir. Hozirda loyiha bir nechta tashkilotlar hamkorligida amalga oshirilmoqda.

«Rosbalt» axborot agentligining xabariga ko'ra, Yangi yil bayrami arafasida «Oziq-ovqat banki» tomonidan 30 mingdan ortiq oziq-ovqat mahsulotlari jamlangan maxsus qop tayyorlangan. Bu o'tgan yilgi ko'rsatkichga nisbatan ikki barobar ko'pdir. Shuning­dek, mamlakatda faoliyat yuritayotgan «Rimi» savdo majmuasi ham loyiha doirasida 3,5 mingdan ortiq shunday gumanitar qoplarni jamlaganini ma`lum qildi.

Shuni alohida ta`kidlash o'rinliki, «Oziq-ov­qat banki» loyihasi ijtimoiy sheriklikning ham yorqin namunasi hisoblanadi. Boisi hozirda mingdan ortiq korxona va tashkilotlar to'g'ridan-to'g'ri mazkur loyihada ishtirok etib kelmoqda. Xususan, 2011 yilda «Swedbank» «Oziq-ovqat banki» loyihasiga 1 800 yevro miqdorida mablag' ajratdi.

Ma`lumotlarga ko'ra, oziq-ovqat mahsulotlari qoplarining har birining qiymati 25-30 yevro atrofida bo'lib, ularning umumiy qiymati qariyb 1 million yevroni tashkil etadi. Buning samarasi o'laroq, o'tgan yili mazkur turdagi gumanitar yordamni mingga yaqin kam ta`minlangan oilalar olgan bo'lsa, joriy yilda ularning soni 1600 dan ortdi.

- Oziq-ovqat mahsulotlari tanqisligi va ularning narxi o'sishidan ushbu mahsulotlarning asosiy qismini chetdan sotib oluvchi davlatlar, xususan, Estoniya mamlakati ham sezilarli darajada jabr ko'rmoqda, - deydi «Oziq-ovqat banki» loyihasi ijrochi direktori Piyt Burfeyn. - «Oziq-ovqat banki» loyihasi doirasida esa ko'plab odamlarga zarur bo'lgan oziq-ovqat mahsulotlari yetkazib berilmoqda. Aytish joizki, hozirda bu loyiha dunyoning bosh­qa bir necha mamlakatida ham amalga oshirilmoqda.

Shuni alohida ta`kidlash o'rinliki, fuqarolar o'rtasida nodavlat notijorat tashkilotlarga ishonchning ortishiga asosiy sabablardan biri ham bu mazkur tashkilotlarning aholi manfaatlari yo'lida olib borayotgan turli yo'nalishdagi loyihalari va sa`y-harakatlari hisoblanadi.