BBC News xabariga ko'ra, Germaniya ma`murlari mamlakatdagi internet tarmog'ida ishlovchi 12 ming kishini bolalar pornografiyasiga oid material almashuv tarmog'i a`zosi deb gumon qilmoqda. UPI agentligining qayd etishicha, ulardan 1700 nafariga ayblov e`lon qilingan.

Utro.ru saytida yozilishicha, o'tayotgan yilning dekabrigacha 110 nafar jurnalist dunyodagi 27 mamlakatda o'z faoliyatini olib borayotgan paytda halok bo'lgan. Mazkur ma`lumot Jenevadagi «Press Emblem kampan» xalqaro tashkiloti ma`ruzasida o'z aksini topgan.

Misr hukumati mamlakatdagi qadimiy yodgorliklar nusxasidan foydalangan mualliflardan badal haqi olishni yo'lga qo'yadigan qonun qabul qilmoqchi, deb yozadi The Telegraph gazetasi.

Utro.ru saytida yozilishicha, Rossiya tashqi ishlar vazirligi BMT bilan hamkorlikda mamlakatda inson huquqlarini rivojlantirish va qo'llab-quvvatlash dasturini ishlab chiqishni rejalashtirmoqda. Bu haqda BMTning Moskvadagi axborot markazida o'tkazilgan brifingda mazkur muassasaning inson huquqlari va gumanitar hamkorlik departamenti direktori ma`lum qilgan.

France Presse axborot agentligi xabariga ko'ra, amerikalik mediamagnat Konrad Blek Chikago federal sudi tomonidan firibgarlikning to'rt epizodi va odil sudlovdan bo'yin tovlaganlik bo'yicha olti yarim yillik qamoq jazosiga hukm etildi. U Hollinger International mediakompaniyasi aksiyadorlarining 6,1 million dollarlik mablag'ini o'g'irlaganlik va o'zining Torontodagi ofisida saqlanayotgan ish hujjatlari mavjud 13 ta qutini yashirishga uringanlikda aybdor deb topildi.

The Telegraph gazetasining yozishicha, 14 dekabr kuni jinoiy ishlar bo'yicha Parij sudida "Milliy front" partiyasi yetakchisi Jan-Mari Le Pen ustidan sud jarayoni boshlangan. U ikkinchi jahon urushi davrida fashizm tomonidan Fransiyada sodir etilgan harbiy jinoyatlarni ommaviy tarzda oqlaganlikda ayblanayapti.

Londondagi mudofaa masalalari bo'yicha tadqiqotlar bilan shug'ullanuvchi qirollik instituti (RUSI) hisobotiga ko'ra, Buyuk Britaniya armiyasi har yili giyohvand moddalar iste`mol qilgani uchun salkam 800 nafar harbiy xizmatchisidan voz kechar ekan. Bu haqda AFP axborot agentligi xabar bergan.

AQSh politsiyasi 9 dekabrga o'tar kechasi Kolorado shtatidagi Yangi hayot cherkovi va missionerlarni tayyorlash markaziga hujum uyushtirib, to'rt kishining umriga zomin bo'lgan jinoyatchining shaxsini aniqladi. Associated Press axborot agentligi tarqatgan xabarga ko'ra, u uch yil avval sog'ligi yomonlashgani sababli missionerlarni tayyorlash markazidan chetlatilgan 24 yoshli Metyu Myurrey ekan.

RIA "Novosti" xabariga ko'ra, Rossiya tashqi ishlar vaziri Buyuk Britaniya tashqi ishlar vazirining Rossiyada "Britaniya kengashi" mintaqaviy vakolatxonalarining yopilishi noqonuniy ekani to'g'risidagi bayonotiga izoh berdi.

Xabaringiz bor, atom energiyasi bo'yicha xalqaro agentlik - MAGATE shu yil o'zining ellik yilligini nishonladi. O'z vaqtida BMT Bosh Assambleyasi qarori bilan tashkil etilgan agentlikka hozir bir yuz o'ttizdan ortiq davlat a`zo hisoblanadi. MAGATE mustaqil faoliyat ko'rsatadigan xalqaro tashkilot bo'lib, Bosh qarorgohi Venada joylashgan.