Yaqinda Rossiya Federatsiyasida faoliyat yuritayotgan «Yashil patrul» umumrossiya jamoat tashkiloti tomonidan mamlakat atrof-muhiti va ekologiyasini ifloslantirayotgan korxonalarning maxsus «reytingi» e`lon qilindi, deb xabar tarqatdi Rossiyaning «Novosti» axborot agentligi.

Mazkur «reyting» nodavlat notijorat tashkilotlar ma`lumotlari, fuqarolar murojaatlari hamda turli tadqiqotlar asosida yuzaga kelgan. Aytish joizki, korxonalar atrof-muhit va ekologiyaga ta`siri bo'yicha bir necha guruhlarga bo'lingan bo'lib, reytingdagi «peshqadamlik»ni Sibir va Ural hududlarida joylashgan korxonalar band etgan.

Eslatib o'tish joizki, Rossiya hukumati o'tgan yili Janubiy Afrika Respublikasining Durban shahrida tashkil etilgan BMTning iqlim o'zgarishlari bo'yicha 17 konferensiyasi doirasida ishtirok etib, Kioto protokolidan chiqishini ma`lum qilgan edi. Bu esa, o'z navbatida, mazkur mamlakatning atrof-muhit va ekologiyani asrash borasidagi obro'yiga salbiy ta`sir ko'rsatgan. Shu bois hozirda Rossiyadagi bir qator ekologik nodavlat tashkilotlar mamlakat hukumatini Kioto protokolini keyingi besh yillikkacha uzaytirishga chaqirgan.

  Timur AHMEDOV