Qalb qo'ri bitilgan ijod namunalari hech qachon mazmun-mohiyatini yo'qotmasdan ijodga oshufta qalblarni doimo o'ziga rom etaveradi. Abduqahhor Ibrohimovning yaqinda «Sharq» nash­riyot-matbaa aksiyadorlik kompaniyasi Bosh tahririyati tomonidan nashr etilgan va eng sara asarlarini jamlagan besh jild­li «Tanlangan asarlar»i xususida ham shu fikrlarni aytish mumkin.

Akademik Baxtiyor Nazarovning so'zboshisi bilan boshlangan birinchi jilddan muallifning o'z vaqtida mashhur bo'lgan, kitobxonlarning takliflariga ko'ra bir necha marta nashr etilgan «Uyqu kelmas kechalar» romani va yigirma oltita lirik va satirik hikoyalari o'rin olgan. Ikkinchi jild dramaturgiya bo'lib, unda muallifning 12 pyesasi, shu jumladan, mamlakatimiz va xorijda nashr etilgan va sahnalashtirilgan «Birinchi bo'sa» lirik dramasi, «Zo'ldir», «Bir o'likni - bir tirikni», «Puch» tragik-komediyalari o'rin olgan. Muallifning milliy davlatchiligimiz asoslariga bag'ishlangan «Bizkim, o'zbeklar...» asari uchinchi jildni tashkil etgan bo'lsa, «Shukr va sabr» deb atalgan to'rtinchi jild  falsafiy o'ylar, maqolalar va hikoyalardan iborat. «Hammamiz bir kemadamiz» deb nomlangan beshinchi jildda «Insof», «Men Buxoroman», «Til - taqdir demak», «Tuz haqi», «Turkiston yaproqlari» kabi yigirma sakkizta badia bilan tanishish mumkin.

Bir so'z bilan aytganda, taniqli ijodkor Abduqahhor Ibrohimovning Vatanimiz mustaqilligining 20 yilligi shodiyonalari arafasida chop etilgan «Tanlangan asarlar»i adabiyot ixlosmandlari uchun o'ziga xos sovg'a bo'lishi shubhasiz.

Sodiq NORBOYEV